(FULLY BOOKED) Żjara lir-Radar ta’ Ħad-Dingli – Avveniment għall-Membri 

Fit-23 ta’ Novembru, il-membri ta’ Heritage Malta huma mistednin iżuru r-Radar ta’ Ħad-Dingli, wieħed mit-tliet radars operattivi f’Malta. Ir-radars huma kruċjali fil-kontroll tat-traffiku tal-ajru, għandhom sehem importanti fis-sorveljanza u l-maniġġar tal-movimenti tal-ajruplani fl-ispazju tal-ajru Malti, u jiżguraw operat effiċjenti u bla periklu fl-avjazzjoni.

Ir-Radar ta’ Ħad-Dingli twaqqaf fl-1939 u kien l-ewwel sistema tar-radar f’Malta, mibni mill-Ingliżi bħala parti mill-infrastruttura tagħhom għad-difiża fil-gwerra. L-ewwel binja, magħrufa bħala l-Air Ministry Experiment Station (AMES) No. 241, aktar tard ingħaqdu magħha radar units oħrajn. Flimkien ma’ stazzjonijiet oħra fil-gżira, kienu jiffurmaw network trijangolari. Matul it-Tieni Gwerra Dinjija, is-sistema tar-radar ġiet integrata ma’ kumplessi taħt l-art u konnessa mal-Lascaris War Room fil-Belt Valletta biex id-difiża tkun tista’ tiġi kkordinata b’mod strateġiku.

Se jsiru tliet tours, kollha bil-Malti, fid-9am, fl-10am, u fil-11am. Din l-attività hija bla ħlas iżda wieħed irid jaqta’ l-biljetti minn qabel – jew minn hawn jew inkella minn kwalunkwe sit jew mużew ta’ Heritage Malta.

It-tours mhumiex ideali għal persuni bi problema ta’ mobilità.